Hilabeteak lanean eman ondoren, gero eta gutxiago falta da Eibar BHI ikastetxeko ikasleek prestatu duten “Beldurra” ikuskizun musikalaren emanaldirako. Maiatzaren 2an, 20:00etan aurkeztuko dute lana, Coliseo antzokian. Sarrerak Coliseoko ohiko salmentaren bidez eskuratu daitezke, 5 eurotan.
Musikalaren proiektua Eibar BHI Guraso Elkartean sortu zen, eta ikastetxeak egitasmo hori aurrera eramateko AKEBAI plataformaren eta Eibarko Udaleko Kultura sailaren laguntza izan du. Eibar BHI ikastetxeak ezarrita duen Hauspoa programaren barruan, eskola ordutegitik kanpo, ikasleek musikala prestatzeko tailerra egiteko aukera izan dute ikasturte honetan ere. Andrea Covadonga antzezlearen gidaritzapean aritu dira dantza, kantak, interpretazioa, koreografia eta gidoia lantzen.
